ജയസൂര്യയെ നായകനാക്കി ജിതിൻ കെ. ജോസ് സംവിധാനം ചെയ്യുന്ന മിസ്റ്ററി ത്രില്ലർ ചിത്രം 'മായൻ ചാപ്റ്റർ 1'ന്റെ ടീസർ പുറത്തിറങ്ങി.നിഗൂഢതയും ഉദ്വേഗവും നിറഞ്ഞ ടീസർ, കേരളത്തിലെ ചില പുരാതന ക്രിസ്തീയ കുടുംബങ്ങളുമായി ബന്ധപ്പെടുത്തി പറയപ്പെടുന്ന കുപ്രസിദ്ധമായ 'കറുത്തച്ചനൂട്ട്' എന്ന ദുരൂഹ ആചാരത്തിന് പിന്നിലെ രഹസ്യങ്ങളിലേക്കാണ് പ്രേക്ഷകരെ കൊണ്ടുപോകുന്നത്. മാജിക് മൂണ്‍ പ്രൊഡക്ഷൻസിന്റെ ബാനറില്‍ രാജീവ് ഗോവിന്ദൻ നിർമിക്കുന്ന ചിത്രം ഡിസംബർ 3ന് ആഗോള റിലീസായി തിയേറ്ററുകളിലെത്തും. 'ബിയോണ്ട് ദ ഷാഡോസ്' എന്ന ടാഗ്‌ലൈനോടെ എത്തുന്ന ചിത്രത്തില്‍ പോലീസ് ഓഫീസറുടെ വേഷത്തിലാണ് ജയസൂര്യ പ്രത്യക്ഷപ്പെടുന്നത്.
ചിത്രത്തിന്റെ പ്രമേയത്തെക്കുറിച്ച്‌ കൂടുതല്‍ ആകാംക്ഷ ജനിപ്പിക്കുന്നതാണ് പുറത്തുവന്ന ടീസർ. കാലങ്ങളായി ചർച്ച ചെയ്യപ്പെടുന്ന രഹസ്യ ആചാരങ്ങളും അതുമായി ബന്ധപ്പെട്ട നിഗൂഢതകളും സിനിമയുടെ കഥയില്‍ നിർണായകമാകുമെന്ന സൂചനയാണ് ടീസർ നല്‍കുന്നത്. ഭീതിയും ദുരൂഹതയും നിറഞ്ഞ ദൃശ്യങ്ങള്‍ക്കൊപ്പം ഉദ്വേഗം നിലനിർത്തുന്ന അവതരണവും ടീസറിനെ ശ്രദ്ധേയമാക്കുന്നു. കേവലമൊരു കുറ്റാന്വേഷണ കഥയ്ക്കപ്പുറം, മറഞ്ഞുകിടക്കുന്ന രഹസ്യങ്ങളുടെ ആഴങ്ങളിലേക്ക് സഞ്ചരിക്കുന്ന മിസ്റ്ററി ത്രില്ലറായിരിക്കും ചിത്രമെന്ന പ്രതീക്ഷയാണ് ടീസർ ഉയർത്തുന്നത്.
'കളങ്കാവല്‍' എന്ന ചിത്രത്തിന് ശേഷം ജിതിൻ കെ. ജോസ് സംവിധാനം ചെയ്യുന്ന സിനിമയാണ് 'മായൻ ചാപ്റ്റർ 1'. 'ഓർഡിനറി', 'അനാർക്കലി' തുടങ്ങിയ വിജയചിത്രങ്ങള്‍ നിർമിച്ച രാജീവ് ഗോവിന്ദൻ മാജിക് മൂണ്‍ പ്രൊഡക്ഷൻസിന്റെ ബാനറില്‍ ഒരുക്കുന്ന മൂന്നാമത്തെ ചിത്രമാണിത്. റാഫിയും ജിതിൻ കെ. ജോസും ചേർന്നാണ് തിരക്കഥ തയ്യാറാക്കിയിരിക്കുന്നത്. നൈല ഉഷയാണ് ചിത്രത്തിലെ നായിക. വിജയ് ബാബു, ഐശ്വര്യ രാജ്, ജിബിൻ ഗോപിനാഥ് എന്നിവരും പ്രധാന കഥാപാത്രങ്ങളായി എത്തുന്നു. ചിത്രീകരണം പൂർത്തിയായ സിനിമയുടെ പോസ്റ്റ് പ്രൊഡക്ഷൻ ജോലികള്‍ പുരോഗമിക്കുകയാണ്.
നൂറ്റാണ്ടുകള്‍ പഴക്കമുള്ള രഹസ്യ ആചാരങ്ങളും ലോകത്തിന്റെ വിവിധ ഭാഗങ്ങളില്‍ ഒളിഞ്ഞുകിടക്കുന്ന ശക്തികളും തമ്മിലുള്ള ബന്ധമാണ് ചിത്രത്തിന്റെ കഥാപരിസരമെന്ന സൂചനകള്‍ നേരത്തെ പുറത്തുവന്നിരുന്നു. കേരളത്തിലെ ചില പുരാതന ക്രിസ്തീയ കുടുംബങ്ങളുമായി ബന്ധപ്പെടുത്തി പറയപ്പെടുന്ന 'കറുത്തച്ചനൂട്ട്' എന്ന ദുർമന്ത്രവാദ രീതിയുടെ പിന്നിലെ രഹസ്യങ്ങളിലേക്കാണ് ചിത്രം കടന്നുചെല്ലുന്നതെന്ന സൂചന ടീസർ കൂടുതല്‍ ശക്തമാക്കുന്നു. ആഗോള പശ്ചാത്തലവും പ്രാദേശികമായി വേരുകളുള്ള ദുരൂഹതകളും കൂട്ടിയിണക്കുന്ന ചിത്രം മലയാളത്തില്‍ വേറിട്ടൊരു മിസ്റ്ററി ത്രില്ലർ അനുഭവം സമ്മാനിക്കുമെന്നാണ് പ്രതീക്ഷ.
അന്താരാഷ്ട്ര സംഗീത രംഗത്തെ പ്രമുഖ കമ്പനിയായ യൂണിവേഴ്സല്‍ മ്യൂസിക് ഗ്രൂപ്പാണ് ചിത്രത്തിന്റെ സംഗീതാവകാശം സ്വന്തമാക്കിയിരിക്കുന്നത്. 13 വർഷത്തെ ഇടവേളയ്ക്ക് ശേഷമാണ് യൂണിവേഴ്സല്‍ മ്യൂസിക് ഗ്രൂപ്പ് വീണ്ടും ഒരു മലയാള സിനിമയുടെ സംഗീതാവകാശം ഏറ്റെടുക്കുന്നത് എന്ന പ്രത്യേകതയുമുണ്ട്.
ഛായാഗ്രഹണം: ഫൈസല്‍ അലി, സംഗീതം: മുജീബ് മജീദ്, എഡിറ്റിംഗ്: പ്രവീണ്‍ പ്രഭാകർ, പ്രൊഡക്ഷൻ കണ്‍ട്രോളർ: ദീപക് പരമേശ്വരൻ, പ്രൊഡക്ഷൻ ഡിസൈനർ: സുനില്‍ ദാസ്, ലൈൻ പ്രൊഡ്യൂസർ: രോഹിത് ആർ. നായർ, കോസ്റ്റ്യൂം: സമീറ സനീഷ്, മേക്കപ്പ്: അമല്‍ ചന്ദ്രൻ, ചീഫ് അസോസിയേറ്റ് ഡയറക്ടർ: ബോസ് വി, വരികള്‍: രാജീവ് ഗോവിന്ദൻ, ജിതിൻ കെ. ജോസ്, കോ-റൈറ്റർ: ശ്രീഖില്‍ ശ്രീനിവാസൻ, സ്റ്റില്‍സ്: സിനത് സേവ്യർ, പ്രോജക്‌ട് ഡിസൈനർ: ആന്റണി സ്റ്റീഫൻ, പി.ആർ.ഒ: വൈശാഖ് സി. വടക്കേവീട്, ജിനു അനില്‍കുമാർ.
