സംസ്ഥാനത്തെ കർഷകർക്ക് വിള വിലവിവരങ്ങളും കാലാവസ്ഥാ മുന്നറിയിപ്പുകളും തത്സമയം ലഭ്യമാക്കുന്ന പുതിയ മൊബൈൽ ആപ്ലിക്കേഷൻ കൃഷി വകുപ്പ് പുറത്തിറക്കി. മലയാളത്തിലും ഇംഗ്ലീഷിലും ലഭ്യമായ ഈ ആപ്പ് വഴി അടുത്തുള്ള കാർഷിക വിപണികളിലെ വിലനിലവാരം, സബ്സിഡി പദ്ധതികൾ, വിള ഇൻഷുറൻസ് എന്നിവയെക്കുറിച്ചുള്ള വിവരങ്ങളും കർഷകർക്ക് ലഭിക്കും. ആദ്യഘട്ടത്തിൽ ഇടുക്കി, വയനാട്, പാലക്കാട് ജില്ലകളിലെ കർഷകർക്കായി പൈലറ്റ് പദ്ധതി ആരംഭിക്കുമെന്നും തുടർന്ന് സംസ്ഥാനം മുഴുവൻ വ്യാപിപ്പിക്കുമെന്നും കൃഷി മന്ത്രി അറിയിച്ചു. നിലവിൽ അയ്യായിരത്തിലധികം കർഷകർ ആപ്പിൽ രജിസ്റ്റർ ചെയ്തിട്ടുണ്ട്.